‘‘จตุนฺนวุติโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, พุทฺธปูชายิทํ ผลํฯ
[34]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[35]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[36]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา วนโกรณฺฑิโย เถโร อิมา คาถาโย
อภาสิตฺถาติฯ
วนโกรณฺฑิยตฺเถรสฺสาปทานํ ฉฏฺฐํฯ
วีสติมํ ภาณวารํฯ
7. เอกฉตฺติยตฺเถรอปทานํ
[37]
‘‘องฺคารชาตา ปถวี, กุกฺกุฬานุคตา มหี;
ปทุมุตฺตโร ภควา, อพฺโภกาสมฺหิ จงฺกมิฯ
[38]
‘‘ปณฺฑรํ ฉตฺตมาทาย, อทฺธานํ ปฏิปชฺชหํ;
ตตฺถ ทิสฺวาน สมฺพุทฺธํ, วิตฺติ เม อุปปชฺชถฯ
[39]
‘‘มรีจิโยตฺถฏา [มริจิโมผุนา (สฺยา.), มรีจิโวผุฏา (ปี.)] ภูมิ, องฺคาราว มหี อยํ;
อุปหนฺติ [อุปวายนฺติ (สี. ปี.)] มหาวาตา, สรีรสฺสาสุเขปนา [สรีรกายุเขปนา (สฺยา.)]ฯ
[40]
‘‘สีตํ อุณฺหํ วิหนนฺตํ [วิหนติ (สฺยา. ก.)], วาตาตปนิวารณํ;
ปฏิคฺคณฺห อิมํ ฉตฺตํ, ผสฺสยิสฺสามิ [ปสฺสยิสฺสามิ (ก.)] นิพฺพุติํฯ
[41]
‘‘อนุกมฺปโก การุณิโก, ปทุมุตฺตโร มหายโส;
มม สงฺกปฺปมญฺญาย, ปฏิคฺคณฺหิ ตทา ชิโนฯ
[42]
‘‘ติํสกปฺปานิ เทวินฺโท, เทวรชฺชมการยิํ;
สตานํ ปญฺจกฺขตฺตุญฺจ, จกฺกวตฺตี อโหสหํฯ
[43]
‘‘ปเทสรชฺชํ วิปุลํ, คณนาโต อสงฺขิยํ;
อนุโภมิ สกํ กมฺมํ, ปุพฺเพ สุกตมตฺตโนฯ
[44]
‘‘อยํ เม ปจฺฉิมา ชาติ, จริโม วตฺตเต ภโว;
อชฺชาปิ เสตจฺฉตฺตํ เม, สพฺพกาลํ ธรียติฯ
[45]
‘‘สตสหสฺสิโต กปฺเป, ยํ ฉตฺตมททิํ ตทา;
ทุคฺคติํ นาภิชานามิ, ฉตฺตทานสฺสิทํ ผลํฯ
[46]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[47]
‘‘สฺวาคตํ วต เม อาสิ…เป.… กตํ พุทฺธสฺส สาสนํฯ
[48]
‘‘ปฏิสมฺภิทา จตสฺโส…เป.… กตํ พุทฺธสฺส สาสนํ’’ฯ
อิตฺถํ สุทํ อายสฺมา เอกฉตฺติโย เถโร อิมา คาถาโย
อภาสิตฺถาติฯ
เอกฉตฺติยตฺเถรสฺสาปทานํ สตฺตมํฯ
8. ชาติปุปฺผิยตฺเถรอปทานํ
[49]
‘‘ปรินิพฺพุเต ภควติ, ปทุมุตฺตเร มหายเส;
ปุปฺผวฏํสเก กตฺวา [ปุปฺผจงฺโกฏเก คเหตฺวา (สฺยา.)], สรีรมภิโรปยิํฯ
[50]
‘‘ตตฺถ จิตฺตํ ปสาเทตฺวา, นิมฺมานํ อคมาสหํ;
เทวโลกคโต สนฺโต, ปุญฺญกมฺมํ สรามหํฯ
[51]
‘‘อมฺพรา ปุปฺผวสฺโส เม, สพฺพกาลํ ปวสฺสติ;
สํสรามิ มนุสฺเส เจ [เว (สฺยา.)], ราชา โหมิ มหายโสฯ
[52]
‘‘ตหิํ กุสุมวสฺโส เม, อภิวสฺสติ สพฺพทา;
ตสฺเสว [กาเยสุ (สฺยา.), กาเยว (ปี.)] ปุปฺผปูชาย, วาหสา สพฺพทสฺสิโนฯ
[53]
‘‘อยํ ปจฺฉิมโก มยฺหํ, จริโม วตฺตเต ภโว;
อชฺชาปิ ปุปฺผวสฺโส เม, อภิวสฺสติ สพฺพทาฯ
[54]
‘‘สตสหสฺสิโต กปฺเป, ยํ ปุปฺผมภิโรปยิํ;
ทุคฺคติํ นาภิชานามิ, เทหปูชายิทํ ผลํฯ
[55]
‘‘กิเลสา ฌาปิตา มยฺหํ…เป.… วิหรามิ อนาสโวฯ
[56]